انا امن الدولة يــا مغفلين

امن دولة ، امن وطني ، ان شا الله يكون امن فنادق حتى ؛ كلها اسماء لنفس السياسة ... فرقت معاكم اوي يعني حكاية الاسم دي ؟! طيب يا سيدي انت و هو ادينا غيرناه ، ها .. حصل حاجة بقى ؟! ابدا لسه زي ما احنا ، لسه بنراقب التليفونات ، لسه بنعتقل من غير تهم موجهة ، لسه بنعذب المعتقلين ، لسه قيادتنا حبيبتنا زي ما هي ، لسه بندخل في كل حاجة في البلد ، لسه مافيش ضوابط ولا مراقبة على شغلنا .. و لو في ، مافيش اللي يحاسبنا .... من الاخر لسه بنعمل اللي احنا عايزينه .

و انتوا بصراحة عملتوا فينا جميل كبير اوي عمري ما هانساه ، خليتونا نغير الاسم و سيبتونا نلعب براحتنا من غير محاسبة و  لا شوية عيال " سيس " زيكم يفضحونا و يقلبوا الرأي العام علينا .

عارفين .. انا عمري ما هاتغير .. اه مش هاتغير اصل بعيد عنكم " الوساخة " دي طبع و المثل بيقول " غلبت اغير فيك و الطبع فيك غالب و ديل امن الدولة عمره ما يتعدل و لو حطوا فيه قالب " . 

انا حلي الوحيد انكم تسرحوني و تسرحوا كل الكوادر القيادات بتاعتي ، كلهم من اول الكبير خالص واخدين بالكم " الكبير خالص" لحد اصغر واحد فينا ، غير كده بقى انسوا انكم تعيشوا مرتاحين .

و بعدين  تعالوا هنا .. انتوا ناسين عملتوا فيا ايه .. ده انا هاربيكم .. انا تعملوا عليا ثورة و تلبسوني السلطنية و تخموني .. انا تنيموني و تقلبوا الدنيا عليا .. لا و كمان عايزني امشي من البلد .. يا بجاحتكم  .. ماشي اصبروا عليا بس .

انا الحمد لله ربنا رزقني بوزير قليل الحيلة معايا و سايبني العب و اعمل اللي يعجبني ، ضحك عليكم و قالكم " انا نقلت كل ظباط امن الدولة الفاسدين من منصابهم و هم لسه باشاوات على مكاتبهم ، و الجميل انه قالكم " سوف نفعل شعار الشرطة في خدمة الشعب " و قالنا احنا " يا رجالة احنا مبدأنا ثابت ما بيتغيرش الشرطة في خورمة الشعب " .. هاهاهاهاهاهاهاهاهاااااي

افرحوا بقى بالاسم الجديد بس في الاخر " انــــا امــــــن الـــــدولـــــــــة يــــــــا مغفــــــليــــن" .