بعد تقريبا شهرين من فض اعتصام رابعة ونهضة مصر لسه بنعيش حالة الكر والفر بين "انصار الشرعية" والنظام الجديد بمواطنينه وحكومته وجيشه وشرطته وسلاطاته وبابا غنجوه، حالات الكر والفر بتنقسم لقسمين .. الاول كر وفر على الارض والواقع المادي و التاني كر وفر في العالم الافتراضي .
على ارض الواقع طبيعي جدا اننا نلاقي مسيرات وفعاليات من المعارضين الجدد "الحكام سابقا" في محاولة منهم لتقليل حجم الخسائر السياسية حتى وان كان على حساب الخسائر في الارواح مش مشكلة .. وتحقيق اكبر قدر ممكن من المكاسب الساسية برضه حتى لو على حساب الاغلبية من الشعب وده طبيعي جدا لان دي سياسية ما فيهاش العواطف
الاخوان كالعادة محترفين بروباجندا وبيساعدهم على ترويج اي اشاعة او كذبة هو الارض الخصبة من الاف الامخاخ الزنخة المجلخة والمتعاطفين والكارهين "لحكم العسكر" واللي كتير منهم كان بيشتم الثوار ايام المجلس العسكري لما كان بيهتفوا بسقوطه بس عادي ما علينا ..بس ازاي الاخوان بيعملوا الزوابع الكدابة دي ..وازاي بيخلقوا حالة الكر والفر في الشوارع واشاعة جو من التوتر في اي مسيرة بيخرجوا بيها ؟
انه العالم الافتراضي .. اللي هو الاعلام الاجتماعي اللي هو السوشيال ميديا .. السوشيال ميديا كانت ومازالت اهم سلاح بتستخدمه المعارضة في اي دولة في العالم لحشد انصارها ورا هدف معين او لترويج الاشاعات او لكشف فضايح النظام لكن العالم الافتراضي ده في اي دولة محترمة بنت اصول ما بينفصلش عن الواقع و اي مستخدم لمواقع التواصل الاجتماعي في اي بلد عنده عقلية و مخ نضيف بيعرف يربط بين الاتنين الا المواطن المصري عموما والمواطن المصري الاخواني او مش اخوان بس بيحترمهم .. عادة لما تعيش في عالم افتراضي فانت بتكون وصلت لمرحلة من اليأس في فرض ارادتك او تغيير شئ في الواقع المادي و ده اللي حاصل مع انصار الشرعية فالصدمة شديدة عليهم خليتهم بعد فض الاعتصامين والملاحقات الامنية لكوادر الاخوان يلجأوا لوهم الاغلبية الرافضة "للانقلاب" لكن على مواقع الاعلام الاجتماعي بمعنى اننا في الفترة الاخيرة ومع دعوات الاخوان للتظاهر سمعنا عن جمعة كسر الانقلاب واسبوع الرحيل ومسميات من هذا القبيل، و قبل واثناء و بعد فعليات اليوم نسمع عن اعداد رهيبة يروجها الاخوان عن الناس اللي شاركت في المظاهرات رغم انها واقعيا في الشارع ما تكملش 100 الف في انحاء الجمهورية على اقصى تقدير .
الاخوان بيعرفوا يستخدموا السوشيال ميديا وبيعرفوا يخلقوا جو من زخم السياسي و البشري عليه و ده لحاجتين الاولى ان تقريبا مافيش حد في قطاع الشباب في مصر ماعندوش اكونت على الفيسبوك او تويتر او ما بيتابعش اليوتيوب او المنتديات او المواقع الاخبارية فبيبقى سهل جدا ترويج الاخبار الصحيح منها و المضروب ،و التانية لان العالم كله بيتابع اللي بيجرى في مصر فتبقى السوشيال مديا نافذة اضافية اوسع انتشارا الي جانب قناة الجزيرة انجليزي و القنوات الاجنبية اللي بتنقل الاحداث في مصر و في سبب تالت و ده الاهم و هو وجود عدد لا حصر له من "مناضلي الكيبورد" و انا بحب اسميهم "المعددين" اللي ما بيصدقوا اي حاجه تحصل عشان يتكلموا عنها مش عشان حاجه غير انهم يلموا اكبر عدد ممكن من المتابعين ، فبكده الاخوان عارفين اهمية السوشيال ميديا
بالاضافة لكل اللي قلته فان السوشيال ميديا عند كتير من الناس مصدر للخبر اكتر من وسيلة لعرض الخبر فبنلاقي ناس كتير بتاخد الاخبار من المواقع دي كأنها قرءان منزل و كأن الانترنت هو اللي بيصنع الحدث و يوثقه و لما تيجي تسأل حد انت بتستقي معلومات منين هيقولك "من النت طبعا يا برنس" و لو سرحت باسئلتك شوية و كملت و قولتله طب النت جاب الخبر منين هيقولك ماعرفش و الاخوان عارفين ان 99% من الناس يتهتم بالخبر اكتر من مصدر الخبر و رغم ان ده مش صح الا انه منطقي لان في الاول و في الاخر اللي يهم المتابع هو الخبر ايا كان صح او غلط و ده بيرجع لحب المعرفة و ده حق طبيعي جدا لاي مواطن
لكن الخطورة هنا في ان كتير من متابعي صفحات الاخوان او الصفحات المتعاطفه معاهم بقى عندهم حالة انعزال عن الواقع و اي حد يناقشهم في ان الارقام اللي بتتكتب عن اعداد الضحايا او المتظاهرين بيكون مبالغ فيها جدا و بيفضل مصر على انها صح لانه شاف صورة متاخدة من زاوية معينة او قرا شهادة لواحد ممكن ما يكونش موجود في مكان الحدث وقت حدوثه او يقرا بعض الكلمات الحماسية فيصدق ان الشارع كله واقف ضد "الانقلاب" او يقرا خبر في موقع اخباري من بتوع بير السلم و يطلع يقول الحقوا ده السيسي خايف و نهايته قربت
اما المحزن ان اصحاب المواقع و الصفحات دي بيبقوا عارفين حقيقة الموضوع و بيستغلوا عدم ثقافة كتير من متابعيهم و يحرفوا الواقع .
ممكن اكون غلطان في رأيي لكن انا بنزل الشارع و بشوف بعيني اللي بيحصل .. اه في مسيرات كل يوم لكنها مش حاشدة زي ما بيدعوا .. و ايوة بيحصل ضرب بس مش من بلطجية زي ما بيدعوا لان فعلا الناس قرفانه من كتر المظاهرات اللي مش جايبه همها بالعكس بتخسر صاحب القضية و بتفقده اي امل في تعاطف الناس معاه
No comments:
Post a Comment